Thursday, March 26, 2009

Beraie Ngenang Nuan....Sulu

Sulu,
Betaun tua udah nanggam pengerindu, tua sama bela udah nemu ulah perangai diri. Sekumbang tua ka begulai, ati aku chukop lantang, penyayau aku sigi ba nuan siku aja, pengerindu enggau penyayau aku ka nuan nadai kala bebagi dua. Taja tua enda berimbai tang nuan tetap ba ati aku belama.

Sulu,
Betaun tua udah begulai, tua sempama baka bungai udah setangkai, tua nadai kala madah ka diri leju enggau pangan diri. Maya begulai, tua sama bela gaga ati. Nuan madah sayau, aku madah rindu...munyi ko leka lagu, "nuan nyadi bungai, aku nyadi kesulai". Sari tua enda betemu tauka betungga mua, tua sama bela madahka pengelenggau ngagai pangan diri, munyi ko leka lagu, “jauh ba mata tang semak ba ati”.

Sulu,
Amat munyi ko jaku urang, pengerindu kelalu lama ditanggam tau sereta nemu ngasuh pengerindu berubah. Diatu nuan nyau udah berubah ati, suba nuan madah sayau tang diatu nuan madah benchi. Suba nuan bejanji enggau aku, sigi enda berubah ati sampai mati tang diatu janji nuan mina tinggal janji….nuan bula ka semaia diri, nuan enda ngamat ka janji diri. Aku enda nemu nama kabuah nuan tau berubah ati. Aku nadai kala ngemedis ka ati nuan, aku nadai kala ngayah sereta bula ka nuan. Pengerindu aku ngagai nuan tetap enda berubah, aku sigi rindu ka nuan belama taja pen nuan udah ninggal ka aku. Enda mudah aku ka ngelengka ka nuan.

Sulu,
Aku nemu nuan udah berubah ati kategal nuan udah bisi laki bukai…munyi ko urang, udah bisi adong belalai. Nuan kala madah sigi enda mudah ngiga laki bukai tang…diatu?? Nuan bula ka jaku diri, nuan enda netap tauka ngamat ka jaku diri….nuan sulu pembula!! Sampai ati nuan ngaga aku bakatu... Aku andal ati amat ninga jaku semaia nuan suba, maya nuan madah sigi tetap jadi enggau aku taja pen apai indai nuan enda setuju, “nadai utai tau nanggul tua”, pio ko nuan suba, tang ke diatu ukai apai indai nuan enda setuju aku jadi enggau nuan tang nuan empu ka enda setuju jadi enggau aku. Nuan semina madah, “udah ukai nasib tua ka jadi”. Nuan udah nemu aku sigi keran amat ka nuan, nuan pen udah nemu aku mina rindu ka nuan siku aja. Pengerindu aku sigi endang amai sulu, aku enda bebagi ati enggau nuan, pengerindu aku enda mudah lela baka lela gula enggau garam.

Sulu,
Nadai aku nyangka nuan berubah ati lalu ngiga laki bukai dikena nukar pengerindu aku ngelamatu….sampai ati nuan ngaga aku bakatu. Nama meh pengurang aku ngunjong ka nuan sanggup ngiga laki bukai?? Nama meh pengelebih iya ari aku?? Iga ga nuan nadai berasai ati sinu ngenang kaul tua suba ka udah 3 taun begulai..

Sulu,
Taja pen nuan nadai agi begulai enggau aku, aku tetap ingat ka nuan belama. Nuan meh indu ka keterubah enggau ka penudi ka pengidup aku. Taja pen ila lusa aku bisi indu bukai ka ganti nuan, nyangka aku enda ulih meri pengerindu aku ngagai iya baka pengerindu aku ngagai nuan. Sulu, tu meh tanda penalam pengerindu aku ngagai nuan.

Sulu,
Lapa meh nuan sanggup ngaga aku bakatu? Nama penyalah aku digaga nuan bakatu? Lapa nuan enda ingat ke semaia tua suba?

Wednesday, March 25, 2009

Kereja ba menua pesisir tauka ba nengeri...

Mayuh bala kitai ka diau ba nengeri sigi endang asal datai ari rumah panjai...lalu bisi mega sigi udah lama mendam/berumah ba nengeri..

Diau ba nengeri sigi mayuh pemedis/penusah enggau penanggul enti kitai nadai tentu bisi kereja ka menyana tauka begaji besai...kelebih agi penanggul ka bakatu suah ka datai enti kitai nyau udah bisi tanggungjawab baka udah berumahtangga, udah bebeli ka rumah, udah bebeli ka kerita enggau utai bukai. Diau ba nengeri semua utai dikena ngena duit magang, ka makai kemiding, makai paku, makai tubu, semua ngena duit magang tang ba menua tauka ba rumah panjai, semua utai nya pechuma magang..

Udah nurun begiga ka kereja ke nengeri, bisi mega bala kitai muchau laban ka ngasai ka pemedis maya ka begiga ka kereja. Bisi mega siku 2 bala kitai temegah ati enti udah kereja ba nengeri...kabuah?? laban ka minta puji urang bukai, "lawa sanu diatu, nyau gawa/kereja ba nengeri...". Sekumbang aku ka udah bekereja ba nengeri, aku ngasaika mayuh amat penanggul datai..enti maya ka suntuk tauka maya begantung senduk, ka nyingkang ka kaki ke bukai pen pedis, kekadang berunding ka mulai ka diri ke menua.

Kategal ka mayuh penanggul ka datai maya diau ba nengeri, mayuh mega ulah ka nyadi tauka runding kitai pen nyau nyadi charut. Bepun ari nya, bisi siku 2 bala kitai nyau begaga ka ulah ka enda menuku, ambika banding baka ngechuri, ngerumpak, nginsap sereta bejual ka dadah enggau pengawa-pengawa ka bukai..

Nama runding bala kitai pasal utai tu? Kereja ba menua pesisir tauka kereja ba nengeri?

Baka perau bekunsi sengayuh, baka rumah besaum pelabuh..

Selamat datai sereta selamat niki ngagai panggau aku..
Arap ka bala ka niki ditu tau bekunsi runding tauka bebagi penemu enggau pangan diri..

Jaku laya sigi enda dasuh sekali, berandau baka diri menyadi, diri sebilik...